मुंबई – महाराष्ट्रात कोरोनाच्या रुग्णांच्या संख्येत गेल्या चोवीस तासात उच्चांकी वाढ झाली आहे. राज्यात एका दिवसात ४३ हजाराहून अधिक नवे रुग्ण आढळले असून २४९ रुग्ण दगावले आहेत. यातील कोरोनाचे ८ हजार ६४६ नवे रुग्ण मुंबईतच आढळले आहेत. कोरोना रुग्णांची वाढलेली संख्या पाहता राज्य सरकारने पुन्हा एकदा कठोर पावले उचलण्याचे संकेत दिले. परिस्थिती नियंत्रणात येत नसेल, तर लॉकडाऊन लावावा लागेल, असे राज्याच्या आरोग्यमंत्र्यांनी म्हटले आहे. तर मुंबईच्या महापौरांनी मॉल, लोकल वाहतूकीवर निर्बंध आणि एक दिवसआड दुकाने उघडण्याचा निर्णय घेतला जाऊ शकतो, असे स्पष्ट संकेत दिले आहेत.

महाराष्ट्रात कोरोनाच्या रुग्ण संख्येत भरमसाठ वेगाने वाढ होत आहे. गेल्या दोन दिवसात सुमारे ८३ हजार नव्या रुग्णांची नोंद झाली आहे. गुरुवारी ४३ हजार १८३ नव्या रुग्णांची नोंद झाली आहे. मुंबई महापालिका, ठाणे, नवी मुंबई, विरार-विसई, मीरा-भाईंदर, कल्याण-डोंबिवली, पनवेल, रायगड आणि पालघरमध्ये मिळून १४ हजार ७८६ नवे रुग्ण आढळले आहेत. तसेच एकूण ३४ जण कोरोनाच्या साथीने दगावले आहेत.

महाराष्ट्रात एका दिवसात कोरोनाने सर्वाधिक बळी नागपूर मंडळात गेले आहेत. नागपूर मंडळात ६४ जण या साथीने दगावले असून ५ हजार ५७५ नव्या रुग्णांची नोंेद झाली. यामध्ये नागपूर पालिका क्षेत्रात २,५८७ रुग्ण आढळले असून ५० जण दगावले आहेत. ठाणे मंडळानंतर सर्वाधिक नवे रुग्ण पुणे मंडळात आढळले आहेत. पुणे मंडळात ९३०९ नव्या रुग्णांची नोंद झाली, तसेच २३ जणांचा या साथीमुळे मृत्यु झाला. लातूर मंडळात २,६८२, औरंगाबाद मंडळात २३२२, अकोला मंडळात १६७४ नवे रुग्ण आढळले आहेत, तर अनुक्रमे ३०, ४३, ६ जण दगावले आहेत.

दरम्यान, आता राज्यात निर्बंधांमध्ये अधिक वाढ होण्याची शक्यता आहे. महाराष्ट्रातील कोरोनाची साथ अटोक्यात येत नसून केंद्रीय आरोग्य विभागाने शुक्रवारी तातडीची बैठक बोलावली आहे. तर लॉकडाऊनचा निर्णय झाला नसला, तरी परिस्थिती बिघडल्यास दुसरा पर्याय नसेल, असे राज्याच्या आरोग्यमंत्र्यांनी म्हटले आहेत. तसेच मुुंबईच्या महापौरांनी लोकल प्रवासावर पहिल्यासारखे निर्बंध आणले जातील, मॉल, थिएटर बंद केले जातील, दुकाने एक दिवस आड उघडली जातील, अशा प्रकारच्या कठोर उपयोजनांवर विचार होत असल्याचे स्पष्ट केले आहे.