लंडन – ‘अमेरिकेचे राष्ट्राध्यक्ष बराक ओबामा यांची हत्या घडवून आणा. त्यामुळे उपराष्ट्राध्यक्ष असलेले बायडेन राष्ट्राध्यक्ष बनतील. बायडेन राष्ट्राध्यक्ष होण्याच्या कुवतीचे नाहीत, त्यामुळे अमेरिकेत अराजक माजेल’, असा खळबळजनक मजकूर असलेले पत्र अल कायदाचा प्रमुख ओसामा बिन लादेन याने आपल्या सहकार्‍याला पाठविले होते. ओबामा राष्ट्राध्यक्ष तर बायडेन उपराष्ट्राध्यक्ष असताना, ओसामा बिन लादेनने लिहिलेले हे पत्र ब्रिटनच्या ‘डेली मेल’ नावाच्या दैनिकाने प्रसिद्ध केले आहे. अफगाणिस्तानातील माघार हाताळण्यात पूर्णपणे अपयशी ठरलेल्या राष्ट्राध्यक्ष बायडेन यांच्या कुवतीवरच प्रश्‍नचिन्ह उपस्थित केले जात असताना, डेली मेलने प्रसिद्ध केलेली ही बातमी अमेरिकेत राजकीय गदारोळ माजविणारी ठरते आहे.
अमेरिकेवर ९/११ चा हल्ला चढविणारा जगातील सर्वात मोठा दहशतवादी असलेल्या ओसामा बिन लादेन याने २०१० साली आपला सहकारी ‘शेख महमूद उर्फ अतियह अब्द अल-रहमान’ याला प्रदिर्घ पत्र लिहिले होते. ४८ पानांच्या या पत्रात बर्‍याच गोष्टी आहेत. पण या पत्राच्या ३६ व्या पानावर लिहिलेल्या गोष्टीने अमेरिकेसह जगाच्या राजकारणातही खळबळ माजू शकते. अमेरिकेचे विद्यमान राष्ट्राध्यक्ष ज्यो बायडेन यांच्या अकार्यक्षमता व अपरिपक्वतेवर अल कायदाच्या प्रमुखाचा फार मोठा विश्‍वास असल्याचे ३६ व्या पानातील मजकूरावरून उघड झाले.
त्यावेळी अमेरिकेचे राष्ट्राध्यक्ष असलेल्या बराक ओबामा यांची हत्या घडवून आणा, अशी सूचना लादेन याने या पत्रात केली. यामुळे अमेरिकेला फार मोठा धक्का बसेल आणि त्यानंतर उपराष्ट्राध्यक्ष असलेल्या ज्यो बायडेन यांची अमेरिकेच्या नियमाप्रमाणे उर्वरित काळासाठी राष्ट्राध्यक्षपदी नियुक्ती होईल. ही बाब आपल्यासाठी अतिशय अनुकूल ठरेल, असे लादेनने आपल्या सहकार्‍याला उद्देशून म्हटले आहे. कारण बायडेन राष्ट्राध्यक्ष होण्याच्या कुवतीचे नाही. ते अपरिपक्व आहेत आणि त्यामुळे अमेरिकेत अराजक माजू शकते, असा तर्क लादेन याने या पत्रात मांडला होता.
अफगाणिस्तानातून सैन्य माघारी घेताना राष्ट्राध्यक्ष बायडेन यांनी अत्यंत बेजबाबदारपणा दाखविला अशी टीका त्यांच्या विरोधकांबरोबर समर्थकही करू लागले आहेत. त्यांच्यामुळेच अफगाणिस्तान तालिबानच्या ताब्यात गेला असून या देशात अराजक माजले आहे, अशी टीका अमेरिकेसह इतर देशांमधूनही होत आहे. बायडेन यांच्या वाढलेले वय तसेच मानसिक क्षमतेवरही प्रश्‍न उपस्थित केले जात आहे. त्यातच अफगाणिस्तानात हाहाकार माजलेला असताना, राष्ट्राध्यक्ष बायडेन ‘कॅम्प डेव्हिड’मध्ये सुट्टी घालवत होते, ही बाब तीव्र टीकेचा विषय बनली होती. अशा परिस्थितीत, ओसामा बिन लादेनेचे प्रसिद्ध झालेल्या या पत्राचा बायडेन यांचे राजकीय विरोधक अत्यंत प्रभावीपणे वापर करू शकतात. बायडेन अमेरिकेच्या शत्रूंना हवे असलेले राष्ट्राध्यक्ष आहेत, अशी टीका याआधीच रिपब्लिकन पक्षाच्या नेत्यांनी सुरू केली होती. सदर पत्रामुळे या टीकेची धार अधिकच वाढू शकेल.
