नवी दिल्ली/मुंबई – देशात कोरोनाच्या रुग्णांची संख्या पुन्हा वाढू लागली आहे. कोरोनावर मात करून रुग्णालयातून बाहेर येणाऱ्या रुग्णांपेक्षा नवे रुग्णांची संख्या वाढत असल्याने सक्रीय रुग्णांची संख्या वाढत आहे. देशातील कोरोनाच्या सक्रीय रुग्णांची संख्या पुन्हा लाखांवर गेली आहे. आठवडाभरापूर्वी हीच सक्रीय रुग्णांची संख्या 77 हजारांपर्यंत खाली आली होती. महाराष्ट्रात शुक्रवारी आठ हजार 67 नव्या रुग्णांची नोंंद झाली, तर केवळ 1760 रुग्ण बरे होऊन परतले. महाराष्ट्रातील ही रुग्णवाढ तिसऱ्या लाटेचे संकेत असल्याचे दावे केले जात आहेत.

गुरुवारच्या दिवसात देशात 16 हजार 764 अधिक कोरोना रुग्ण आढळले होते, 220 जणांचा बळी गेला होता. मात्र शुक्रवारी सायंकाळपर्यंत विविध राज्यातून जाहीर झालेली एका दिवसातील कोरोना रुग्णांची संख्या लक्षात घेता चोवीस तासातील देशभरातील रुग्णसंख्या 20 हजारांवर गेल्याचे स्पष्ट होत आहे. महाराष्ट्रात आठ हजाराहून अधिक नव्या रुग्णांची नोंद झाली आहे. गुरुवारच्या तुलनेत रुग्णसंख्येत 50 टक्क्यांची वाढ झाली आहे. तसेच दिवसभरात आठ जणांचा बळी गेला आहे. महाराष्ट्रात आढळलेल्या नव्या रुग्णांपैकी 5 हजार 428 रुग्ण हे एकट्या मुंबईत आढळले आहेत. गुरुवारच्या तुलनेत मुंबईतील नव्या रुग्णांची ही दैनंदिन संख्या 47 टक्क्यांनी वाढली आहे. तर तीन दिवसात हेच प्रमाण दुप्पटीने वाढले आहे.

केरळात 2676, कर्नाटकात 832 आढळले आहेत. दिल्ली, पश्‍चिम बंगालमध्येही आठवड्याभरात कोरोनाच्या रुग्णांच्या संख्येत वाढ झाली आहे. दरम्यान, भारतात कोरोना लसीकरण मोहिमेअंतर्गत 145 लसींसे डोस देण्याचा टप्पा ओलांडला गेला आहे. तसेच विविध राज्य सरकारे व केंद्रशासित प्रदेशांकडे 16.94 कोटी लसी सध्या उपलब्ध आहेत. राज्यांना लसीकरण वाढविण्यास सांगण्यात आले आहे. लस न घेतलेल्या नागरिकांपर्यंत पोहोचून लसीकरणाला वेग द्या, असे आवाहन केंद्र शासनाने केले. आहे.