नेगेव्ह – जीवशास्त्रज्ञाचा कम्प्युटर मालवेयरने दूषित करुन त्या कम्प्युटरमधील जनुकांची संरचना विषारी करण्याचा आणि याद्वारे जैविक दहशतवादी हल्ला घडविण्याचा मोठा कट सायबर हल्लेखोरांनी आखला आहे. या हायब्रिड सायबर जैविक हल्ल्याद्वारे जीवशास्त्रज्ञ त्यांच्याही नकळत स्वत:च्याच प्रयोगशाळेत विषारी रसायने किंवा विषाणू तयार करू शकतात, असा इशारा सायबर संशोधकांनी आपल्या जर्नलमधून दिला आहे.
इस्रायलच्या ‘बेन-गुरियन विद्यापीठा’तील सायबर संशोधकांनी ‘नेचर बायोटेक्नोलॉजी’ या जर्नलमध्ये जैविक दहशतवाद्यांबाबत सावध केले आहे. अमानवी हॅकर्स आणि जैव दहशतवादी एकत्र येऊन प्रयोगशाळेतील जनुकांची माहिती असणारा जीवशास्त्रज्ञाचा कम्प्युटर हॅक करू शकतात. हे हॅकर्स व जैव दहशतवादी सदर जीवशास्त्रज्ञाच्या कम्प्युटरमधील जनूकांची संरचना विषारी प्राणघातक संरचनेने बदलतील, अशी चिंता इस्रायली सायबर संशोधकांनी व्यक्त केली.
अमेरिकेच्या आरोग्य विभागाने जनूके पुरविणाऱ्यांसाठी मार्गदर्शक तत्वे पुरविली आहेत. पण सायबर हॅकर्स यातही गोंधळ माजवून विषारी जनूके मार्गदर्शक तत्वांना ओलांडून बाहेर काढली जाऊ शकतात, असा इशारा इस्रायली संशोधकांनी दिला आहे. इस्रायली सायबर संशोधक गटाच्या प्रमुख रामी पझीस यांनी यासाठी काही उदाहरणेही मांडली आहे. 50 पैकी 16 विषारी जनूके अमेरिकेच्या मार्गदर्शक तत्वांच्या स्क्रिनिंगमध्ये सापडलीच नाही, असा दावा पझीस यांनी केला.
त्यामुळे फारच कुचकामी सायबर सुरक्षेमुळे हॅकर्स जीवशास्त्रज्ञाच्या कम्प्युटरचा ताबा मिळवून त्यातील जनूकांच्या संरचनेत विषारी बदल घडवून मोठा जैविक दहशतवादी हल्ला घडवू शकतात, असा इशारा इस्रायली सायबर संशोधकांच्या गटाने आपल्या जर्नलमधूण दिला आहे.
