लंडन – संयुक्त अरब अमिरातसाठी जाणार्‍या इंधनवाहू जहाजावर ओमानजवळ हल्ला झाला. सदर जहाज इस्रायली उद्योजकाच्या मालकीचे असल्याची माहिती ब्रिटनच्या लष्करी गटाने दिली. या हल्ल्यामागे सागरी लुटारू असल्याचा दावा केला जातो. पण इस्रायल आणि इराणमधील वाढत्या तणावाच्या पार्श्‍वभूमीवर, या जहाजावर झालेल्या हल्ल्याकडे संशयाने पाहिले जाते. गेल्या महिन्याभरात इस्रायली जहाजावर झालेला हा दुसरा हल्ला ठरतो.

गुरुवारी रात्री उशीरा ओमानची राजधानी मस्कतपासून साधारण 300 किलोमीटर अंतरावरुन प्रवास करनार्‍या ‘मर्सर स्ट्रिट’ या इंधनवाहू जहाजावर हल्ला झाला. सदर जहाज लंडनस्थित इस्रायली व्यावसायिक एअल ओफर यांच्या झोडियाक मेरिटाईम कंपनीचे असल्याची माहिती ब्रिटनच्या ‘युनायटेड किंगडम मेरिटाईम ट्रेड ऑपरेशन्स’ने दिली.

सुरुवातीला इस्रायली कंपनीने याबाबत प्रतिक्रिया देण्याचे टाळले होते. पण शुक्रवारी दुपारी सदर कंपनीने मर्सर स्ट्रिटवर हल्ला झाल्याचे मान्य केले. मात्र आपली कंपनी हे जहाज चालवते पण याची मालकी जपानकडे असल्याचे स्पष्ट केले. तरीही इस्रायल आणि इराणमधील तणावाच्या पार्श्‍वभूमीवर, सदर जहाजावर झालेला हल्ला चिंता वाढविणारा असल्याचा दावा आंतरराष्ट्रीय माध्यमे करीत आहेत.

दरम्यान, गेल्या काही महिन्यांमध्ये हिंदी महासागर, ओमानचे आखात, रेड सी तसेच सिरियाच्या सागरी क्षेत्रातून प्रवास करणार्‍या इस्रायल व इराणच्या मालवाहू तसेच लष्करी जहाजांवरील हल्ले वाढले आहेत. इस्रायल व इराणमध्ये सुरू असलेल्या अघोषित युद्धाचा हा एक भाग असल्याचे दिसू लागले आहे.

इस्रायलशी संबंधित व युएईला जाणार्‍या जहाजांना लक्ष्य केले जात असल्याचेही विश्‍लेषक लक्षात आणून देत आहेत. जुलै महिन्याच्या सुरुवातीलाही युएईला जाणार्‍या मालवाहू जहाजावर हल्ला झाला होता. इस्रायल व युएईत प्रस्थापित झालेल्या सहकार्याच्या पार्श्‍वभूमीवरही या दोन्ही हल्ल्यांकडे पाहिले जाते.