सेऊल – चार वर्षानंतर अमेरिका आणि दक्षिण कोरियाच्या नौदलामध्ये युद्धसराव पार पडला. यामध्ये अमेरिकेची विमानवाहू युद्धनौका आणि दक्षिण कोरियाच्या विनाशिका सहभागी झाल्या होत्या. उत्तर कोरियाबरोबरील वाढत्या तणावाच्या पार्श्वभूमीवर, अमेरिका व दक्षिण कोरियामध्ये हा सराव पार पडल्याचा दावा केला जातो.
अमेरिकेची विमानवाहू युद्धनौका ‘युएसएस रोनाल्ड रिगन’ तसेच दक्षिण कोरियाची ‘मरादो’ ॲम्फिबियस युद्धनौका आणि सेजाँग व अन्य विनाशिकांचा समावेश होता. पूर्व फिलिपाईन्सची सागरीहद्द आणि ओकिनावा बेटाचे आखात या क्षेत्रात हा सराव पार पडला. 2019 सालापासून अमेरिका आणि दक्षिण कोरियातील युद्धसराव रद्द करण्यात आला होता.
पण दक्षिण कोरियात झालेल्या सत्ताबदलानंतर अमेरिकेबरोबरच्या युद्धसरावाची सुरुवात झाली आहे. तर अमेरिकेबरोबर लष्करी तळ पुरविण्याबाबत नवा करार केला जाण्याची शक्यता आहे. अमेरिका व दक्षिण कोरियातील या लष्करी सहकार्याला उत्तर कोरियाने विरोध केला होता. त्यानंतरच उत्तर कोरियाने अणुचाचणीची तयारी सुरू केल्याच्या बातम्या समोर आल्या होत्या.
दरम्यान, या युद्धसरावानंतर अमेरिका व दक्षिण कोरियाच्या युद्धनौका हवाई बेटासाठी रवाना होतील. या ठिकाणी लवकरच बहुराष्ट्रीय युद्धसराव होणार आहे.
