नॉरफोल्क – ‘अटलांटिक क्षेत्रातील सुरक्षाविषयक आव्हाने अधिक गुंतागुंतीची बनली आहेत. अशा परिस्थितीत नॉरफोल्कमधील कमांड या क्षेत्रातील सुरक्षा व स्थैर्यासाठी नाटोची वचनबद्धता दाखवून देणारी ठरते. शत्रूला रोखण्यासाठी निर्णायक संकेत देणारी ही कमांड उत्तर अमेरिका व युरोपिय देशांची सुरक्षा आश्‍वस्त करणारी ठरते’, या शब्दात नाटोचे कमांडर व्हाईस अ‍ॅडमिरल ऐंड्य्रू लुईस यांनी अमेरिकेच्या नॉरफोल्क तळावरील ‘जॉईंट फोर्स कमांड’ पूर्ण क्षमतेने सक्रिय झाल्याची घोषणा केली. यावेळी अमेरिकेचे संरक्षणदलप्रमुख जनरल मार्क मिले यांनी सदर कमांडचे मुख्य कार्य ‘बॅटल ऑफ द अटलांटिक’ लढणे असल्याकडे लक्ष वेधले.
रशियाच्या वाढत्या लष्करी हालचालींच्या पार्श्‍वभूमीवर 2018 साली नाटोने दोन स्वतंत्र कमांड्सची घोषणा केली होती. त्यातील एक कमांड युरोपमध्ये तर दुसरी अमेरिकेत असेल, असे सांगण्यात आले होते. याच कालावधीत अमेरिकेनेही आपल्या नौदलाचे दुसरे आरमार (सेकंड फ्लीट) पुन्हा कार्यरत करण्याचे जाहीर केले होते. नाटोची नवी कमांड अमेरिकेच्या या दुसर्‍या आरमाराबरोबर संयुक्तरित्या काम करणार आहे. नव्या ‘जॉईंट फोर्स कमांड’मध्ये दीडशेहून अधिक जवान व अधिकार्‍यांचा समावेश आहे.
गेल्या आठवड्यात अमेरिकी नौदलाची ‘अ‍ॅम्फिबियस अ‍ॅसॉल्ट शिप’ ‘युएसएस किअरसर्ज’वर झालेल्या 
कार्यक्रमात नाटोने नवी कमांड पूर्ण क्षमतेने कार्यरत झाल्याचे जाहीर केले. यावर्षी मे व जून महिन्यात झालेल्या ‘स्टेडफास्ट डिफेन्डर 21’ या युद्धसरावाच्या पहिल्या टप्प्याची जबाबदारी नव्या ‘जॉईंट फोर्स कमांड’ने पार पाडली होती, असेही यावेळी सांगण्यात आले. अमेरिकेतील हे कमांड नाटोचे तिसरे ‘जॉईंट फोर्स कमांड’ असून युरोपातील नेदरलॅण्डस् व इटलीमध्ये दोन जॉईंट फोर्स कमांड कार्यरत आहेत.
‘नाटोच्या जॉईंट फोर्स कमांडचे मुख्य मिशन युद्धाच्या काळात अटलांटिकमध्ये होणार्‍या संघर्षाची जबाबदारी सांभाळणे हे असेल. जर तुम्हाला इतिहासाची माहिती असेल आणि दुसर्‍या महायुद्धाबद्दल नीट कल्पना असेल, तर अटलांटिकमधील संघर्ष किती महत्त्वाचा आहे हे वेगळे सांगण्याची गरज नाही’, अशा शब्दात अमेरिकेचे संरक्षणदलप्रमुख मार्क मिले यांनी कमांडचे महत्त्व स्पष्ट केले. त्याचवेळी भविष्यात युरोपमध्ये युद्ध झाल्यास त्याचे यशापयश जॉईंट फोर्स कमांडच्या कामगिरीवर अवलंबून असेल, असेही जनरल मिले यांनी बजावले. यावेळी त्यांनी सध्या जगात ‘ग्रेट पॉवर कॉम्पिटिशन’ सुरू असल्याकडेही लक्ष वेधले.
